കരുവഞ്ചാൽ: കാലാവസ്ഥാ വ്യതിയാനം, വന്യജീവി ആക്രമണം, ഭക്ഷ്യ-നാണ്യ വിളകളുടെ വിലത്തകർച്ച എന്നിവ മൂലം കടക്കെണിയിലായ കർഷക സമൂഹത്തിന് ആശ്വാസം നൽകാൻ വിവിധ പദ്ധതികൾ നടപ്പിൽ വരുത്താൻ കത്തോലിക്ക കോൺഗ്രസ് തലശേരി അതിരൂപത കമ്മിറ്റി തീരുമാനിച്ചു.
കർഷകർക്ക് ആശ്വാസം നൽകേണ്ട കേന്ദ്ര-സംസ്ഥാന സർക്കാരുകൾ മുഖം തിരിച്ചു നിൽക്കുകയാണെന്നും കർഷകർക്കു വേണ്ടി ശബ്‌ദിക്കേണ്ട രാഷ്ട്രീയ പാർട്ടികൾ അവരുടെ പ്രശ്നങ്ങൾ കണ്ടതായി നടിക്കുന്നില്ലെന്നും കത്തോലിക്ക കോൺഗ്രസ് ആരോപിച്ചു.
കാർഷിക കടങ്ങൾ മൂലം ദുരിതം അനുഭവിക്കുന്ന കർഷകരുടെ കടങ്ങൾ എഴുതിത്തള്ളാൻ വേണ്ട അപേക്ഷകൾ കാർഷിക കടാശ്വാസ കമ്മീഷൻ മുമ്പാകെ എത്തിക്കുന്നതിന് വേണ്ട സഹായ സഹകരണങ്ങൾ കത്തോലിക്ക കോൺഗ്രസ് നൽകും.
കൃഷിഭവൻ മുഖേന കർഷകർക്ക് ലഭിക്കേണ്ട ആനുകൂല്യങ്ങൾ നേടിയെടുക്കുന്നതിനും കർഷകരുടെ കടങ്ങൾ ലഘൂകരിക്കുന്നതിനായി താലൂക്ക് ലീഗൽ അഥോറിറ്റിയിൽ അപേക്ഷകൾ നൽകാനും ഉപയുക്തമായ ഹെൽപ്പ് ഡെസ്ക്കുകൾ ഓരോ ഇടവകയിലും ആരംഭിക്കാനും കത്തോലിക്ക കോൺഗ്രസ് തീരുമാനിച്ചു.
കർഷക ക്ഷേമ പദ്ധതികളുടെ തലശേരി അതിരൂപത തലത്തിലുള്ള ഉദ്ഘാടനം 21ന് ഉച്ചകഴിഞ്ഞ് രണ്ടിന് വായാട്ടുപറമ്പ് സെന്‍റ് ജോസഫ് പാരിഷ് ഹാളിൽ തലശേരി അതിരൂപത ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്യും.
അതിരൂപത പ്രസിഡന്‍റ് അഡ്വ. ടോണി ജോസഫ് പുഞ്ചക്കുന്നേൽ അധ്യക്ഷത വഹിക്കും. അതിരൂപത ഡയറക്ടർ ഫാ. ഫിലിപ്പ് കവിയിൽ മുഖ്യപ്രഭാഷണം നടത്തും. കത്തോലിക്ക കോൺഗ്രസ് ഗ്ലോബൽ വർക്കിംഗ് കമ്മിറ്റിയംഗം അഡ്വ. ബിനോയ് തോമസ് വിവിധ സഹായ പദ്ധതികളെ കുറിച്ച് വിശദീകരണം നൽകും.
കരുവഞ്ചാൽ സെന്‍റ് ജോസഫ് പാരിഷ് ഹാളിൽ ചേർന്ന ആലോചനാ യോഗം അതിരൂപത പ്രസിഡന്‍റ് അഡ്വ. ടോണി ജോസഫ് പുഞ്ചക്കുന്നേൽ ഉദ്ഘാടനം ചെയ്തു. ജോസ് ഏത്തക്കാട്ട് അധ്യക്ഷത വഹിച്ചു. ഫാ. റിമൽ ഇഞ്ചനാനിക്കൽ മുഖ്യപ്രഭാഷണം നടത്തി. അഡ്വ. ബിനോയ് തോമസ്, ഫിലിപ്പ് വെളിയത്ത്, ജിമ്മി ഐത്തമറ്റം, ജിമ്മി മേലുകുന്നേൽ, ജോർജ് വില്ലന്താനം, ജേക്കബ് ചെത്തിമറ്റം, ബേബി വളയത്ത് എന്നിവർ പ്രസംഗിച്ചു.
Post a Comment
താഴെ നൽകുന്ന അഭിപ്രായം കണ്ണൂരാൻ വാർത്തയുടേത് അല്ല വ്യക്തി അഭിപ്രായങ്ങൾ അവരുടെ കാഴ്ചപ്പാട് ആണ് മതസ്പർദ്ധക്ക് ഇടയാക്കുന്ന അശ്ലീലപദപ്രയോഗങ്ങൾ എന്നിവ ഒഴിവാക്കി വാർത്തയിലെ അഭിപ്രായങ്ങൾ സുതാര്യമായി നൽകണം എന്ന് അറിയിക്കുന്നു