ബിജെപി ദേശീയ അധ്യക്ഷൻ കണ്ണൂരിൽ റോഡ് ഷോ നടത്തി

കേന്ദ്ര ഏജൻസികളെ കത്തയച്ചു വിളിച്ചുവരുത്തിയ ഇടതുസർക്കാർ അന്വേഷണം മുഖ്യമന്ത്രിയുടെ ഓഫീസിലെത്തിയപ്പോൾ അത് അവസാനിപ്പിക്കാൻ ആവശ്യപ്പെടുന്നു എന്ന് ബിജെപി ദേശീയ അധ്യക്ഷൻ ജെ പി നദ്ദ. ധർമ്മടം നിയോജക മണ്ഡലത്തിൽ എൻ ഡി എ സ്ഥാനാർത്ഥി സി കെ പത്മനാഭന്റെ തെരഞ്ഞെടുപ്പ് പ്രചരണത്തിന്റെ ഭാഗമായി നടത്തിയ റോഡ് ഷോയിലും ജെ പി നദ്ദ പങ്കെടുത്തു. 

സംസ്ഥാനത്ത് ഇരുമുന്നണികളും കസേരകളിയാണ് നാളിതുവരെ നടത്തിയത് എന്ന് ആക്ഷേപിച്ച് ബിജെപി ദേശീയ അധ്യക്ഷൻ ജെ പി നദ്ദ പുതിയ കേരളം മോദിക്കൊപ്പം ആണെന്ന് അവകാശപ്പെട്ടു. കഴിഞ്ഞ സർക്കാർ സരിതയുമായും ഈ സർക്കാർ സ്വപ്നയുമായും ബന്ധപ്പെട്ടു അഴിമതി നടത്തി. സിപിഎമ്മിന്റെ ക്രിമിനൽ രാഷ്ട്രീയത്തിൽ കേരളത്തിലെ ജനങ്ങൾ ഭയന്നിരിക്കുകയാണെന്ന് ആരോപിച്ച് ജെപി നദ്ദ സംസ്ഥാനത്ത് മോദി സർക്കാർ വൻ വികസന പദ്ധതികളാണ് ലക്ഷ്യമിടുന്നതെന്ന് വ്യക്തമാക്കി. ശബരിമല വിഷയത്തിൽ ബിജെപി മാത്രമാണ് പ്രക്ഷോഭം സംഘടിപ്പിച്ചതെന്നും കോൺഗ്രസ് വാചകമടി മാത്രം നടത്തുകയാണ് ചെയ്തതെന്നും അദ്ദേഹം ആരോപിച്ചു. ചക്കരക്കല്ലിൽ നടന്ന റോഡ് ഷോയിൽ ധർമ്മടത്ത് മത്സരിക്കുന്ന സി കെ പത്മനാഭൻ ഉൾപ്പെടെയുള്ള ജില്ലയിലെ എൻ ഡി എ സ്ഥാനാർഥികളും പങ്കെടുത്തു.