വിഷം കലർന്ന ഭക്ഷണം കഴിച്ച് അമ്മ ചത്തുപോയി, അനാഥയായ പൂച്ചക്കുഞ്ഞിന് തുണയായി തെരുവുനായയും കുഞ്ഞും

വിഷം കലർന്ന ഭക്ഷണം കഴിച്ച് ‘അമ്മ ചത്തുപോയ പൂച്ചക്കുഞ്ഞിന് തുണയായി തെരുവുനായ. മൂത്തേടം കൽക്കുളത്താണ് മനസ് നിറയ്ക്കുന്ന ഈ കാഴ്ച. കൽക്കുളം അങ്ങാടിക്കു സമീപമുള്ള വീട്ടിലാണ് പൂച്ച 2 കുട്ടികളെ പ്രസവിച്ചത്. എന്നാൽ 4 ദിവസം മുൻപ് തള്ളപ്പൂച്ച വിഷം കലർന്ന ഭക്ഷണം കഴിച്ചതിനെത്തുടർന്ന് ചത്തുപോവുകയായിരുന്നു. ഇതിനിടയിൽ രണ്ടു കുട്ടികളിൽ ഒന്നിനെ കാണാതെയുമായി. ഈ സമയത്താണ് ഒരു പൂച്ചക്കുട്ടിയെ തെരുവുനായ കടിച്ചുകൊണ്ടുപോകുന്നത് ‌ആളുകൾ കണ്ടത്. പൂച്ചക്കുട്ടിയെ നായ കൊന്നുവെന്നു കരുതിയ പ്രദേശവാസികൾ എന്നാൽ പിന്നീട് കണ്ടത് പൂച്ചക്കുട്ടി നായയുടെ പാൽ കുടിക്കുന്നതാണ്. അടുത്തിടെ പ്രസവിച്ച നായയ്ക്കും ഒരു കുട്ടിയുണ്ട്. നായ എവിടെയെങ്കിലും പോയാൽ പൂച്ചക്കുട്ടിക്കു കാവൽ നായക്കുട്ടിയാണ്.