നാടെങ്ങും തീ; വിശ്രമമില്ലാതെ അഗ്നിരക്ഷാസേന

പെരിങ്ങോം : കാട്ടു തീപടരുന്നു, വിശ്രമമില്ലാതെ പെരിങ്ങോം അഗ്നി രക്ഷാസേന. കഴിഞ്ഞദിവസം വൈകിട്ട് അഞ്ചോടെ പെരിങ്ങോം മരാമത്ത് റസ്റ്റ് ഹൗസ്, ഫയർ സ്റ്റേഷൻ, ഗവ. ഐടിഐ, റസിഡൻഷ്യൽ സ്കൂൾ തുടങ്ങിയ സർക്കാർ സ്ഥാപനങ്ങളുള്ള പാറ പ്രദേശത്താണ് തീ പടർന്നത്. സ്റ്റേഷൻ ഓഫിസർ പി.വി.അശോകന്റെ നേതൃത്വത്തിൽ രണ്ട് ഫയർഫോഴ്സ് യൂണിറ്റുകൾ മണിക്കൂറുകളോളം നടത്തിയ പരിശ്രമത്തിലാണ് തീ അണച്ചത്. 

വെയിൽ കനത്തതോടെ പെരിങ്ങോം വയക്കര, എരമം കുറ്റൂർ, കാങ്കോൽ ആലപ്പടമ്പ ഗ്രാമപഞ്ചായത്തുകളിൽ ഒട്ടേറെ പ്രദേശങ്ങളിൽ കാട്ടുതീ പടർന്നിരുന്നു. കഴിഞ്ഞ ദിവസം രാത്രിയിൽ അനിക്കംപാറയിൽ വൻ തീപിടുത്തമുണ്ടായിരുന്നു. ഒരു പ്രദേശത്ത് തീയണച്ച് വരുമ്പോൾ മറ്റൊരു പ്രദേശത്ത് തീപടരുന്നത് പതിവാണെന്ന് സേനാംഗങ്ങൾ പറയുന്നു.