ഓടകൾ വൃത്തിയായില്ല; കേളകം ടൗണിൽ വെള്ളമൊഴുകുന്നത് റോഡിലൂടെ

കേളകം: വേനൽ മഴ കനത്തതോടെ കേളകം ടൗണിൽ മഴവെള്ളം ഒഴുകുന്നത് റോഡിലൂടെ. ഓവുചാലുകൾ ശുചിയാക്കാത്തതാണ് പ്രധാന കാരണം. മഴവെള്ളം ഒഴുകേണ്ട ഓവുചാലുകൾ പ്ലാസ്റ്റിക്കുകളാലും മാലിന്യങ്ങളാലും നിറഞ്ഞ് മഴ പെയ്യുമ്പോൾ പ്ലാസ്റ്റിക്കുകളും മാലിന്യങ്ങളും ഉൾപ്പെടെ റോഡിലേക്കാണ് ഒഴുകിയെത്തുന്നത്.

കേളകം പഞ്ചായത്ത് സുവർണ ജൂബിലിയോടനുബന്ധിച്ച് ‘ശുചിത്വ കേളകം സുവർണ കേളകം’ പദ്ധതിയിൽ ഉൾപ്പെടുത്തി പഞ്ചായത്തിന്റെയും വ്യാപാരികളുടെയും നേതൃത്വത്തിൽ ടൗൺ ശുചീകരിച്ചിരുന്നുവെങ്കിലും ഓടകൾ വൃത്തിയാക്കിയിരുന്നില്ല. മലയോര മേഖലയിൽ ഡെങ്കിപ്പനി ഉൾപ്പെടെയുള്ള പകർച്ച വ്യാധികൾ പടർന്ന് പിടിക്കുമ്പോൾ ഇത്തരത്തിൽ മലിന ജലം റോഡിലേക്ക് ഒഴുകിയെത്തുന്നത് വൻ ആശങ്കയാണുണ്ടാക്കുന്നത്.