പയ്യന്നൂര്‍: രാമന്തളിയില്‍ കോണ്‍ഗ്രസ് പ്രകടനത്തിനുനേരെ ആക്രമണം. വനിത നേതാവ് അടക്കം രണ്ടുപേര്‍ക്ക് പരിക്കേറ്റു. പയ്യന്നൂര്‍ ബ്ലോക്ക് യൂത്ത് കോണ്‍ഗ്രസ് സെക്രട്ടറി കെ.പി. മഹിത, പയ്യന്നൂര്‍ ബ്ലോക്ക് കോണ്‍ഗ്രസ് വൈസ് പ്രസിഡന്‍റ് കെ.പി. രാജേന്ദ്രകുമാര്‍ എന്നിവര്‍ക്കാണ് പരിക്കേറ്റത്. ഇവരെ പയ്യന്നൂര്‍ പ്രിയദര്‍ശിനി ആശുപത്രിയില്‍ പ്രവേശിപ്പിച്ചു. ശനിയാഴ്ച രാത്രി 7.30ഓടെ രാമന്തളി ഓണപ്പറമ്ബിലാണ് സംഭവം. ഓണപ്പറമ്ബില്‍ സ്ഥാപിച്ച കോണ്‍ഗ്രസി‍െന്‍റ കൊടിമരം കഴിഞ്ഞ ഒരു മാസത്തിനിടയില്‍ അഞ്ചു തവണ നശിപ്പിച്ചിരുന്നു.
കഴിഞ്ഞ ദിവസവും ഈ കൊടിമരം നശിപ്പിച്ചു. ഇതില്‍ പ്രതിഷേധിച്ച്‌ മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തില്‍ ഓണപ്പറമ്ബില്‍ നടത്തിയ പ്രതിഷേധ പ്രകടനത്തിനിടയിലാണ് അക്രമം നടത്തിയത്. അക്രമത്തിനുപിന്നില്‍ സി.പി.എം പ്രവര്‍ത്തകരാണെന്ന് കോണ്‍ഗ്രസ് ആരോപിച്ചു. പ്രകടനത്തിനുശേഷം പ്രതിഷേധ യോഗം നടക്കുന്നതിനിടെ സംഘടിച്ചെത്തിയ സി.പി.എം പ്രവര്‍ത്തകര്‍ യോഗം അലങ്കോലമാക്കാന്‍ ശ്രമം നടത്തിയതായും പരാതിയുണ്ട്.
സംഭവ സ്ഥലത്തുണ്ടായിരുന്ന പൊലീസ് ഇടപെട്ട് പ്രശ്നം ശാന്തമാക്കിയശേഷം കോണ്‍ഗ്രസ് പ്രവര്‍ത്തകര്‍ മടങ്ങുന്നതിനിടെയാണ് അക്രമം നടന്നതെന്ന് പറയുന്നു. ബൈക്കില്‍ കയറുന്നതിനിടെയാണ് കെ.പി. രാജേന്ദ്ര കുമാറിന് മര്‍ദനമേറ്റത്. ചെവിക്കും മുഖത്തും പരിക്കുണ്ട്. രാജേന്ദ്രകുമാറിനെതിരെയുള്ള അക്രമം തടയാന്‍ ശ്രമിക്കുന്നതിനിടെയാണ് മഹിതക്ക് പരിക്കേറ്റത്.
പരിക്കേറ്റവരെ ഡി.സി.സി അംഗം അഡ്വ. ഡി.കെ. ഗോപിനാഥ്, രാമന്തളി മണ്ഡലം പ്രസിഡന്‍റ് വി.വി. ഉണ്ണികൃഷ്ണന്‍ തുടങ്ങിയവര്‍ സന്ദര്‍ശിച്ചു.
Post a Comment
താഴെ നൽകുന്ന അഭിപ്രായം കണ്ണൂരാൻ വാർത്തയുടേത് അല്ല വ്യക്തി അഭിപ്രായങ്ങൾ അവരുടെ കാഴ്ചപ്പാട് ആണ് മതസ്പർദ്ധക്ക് ഇടയാക്കുന്ന അശ്ലീലപദപ്രയോഗങ്ങൾ എന്നിവ ഒഴിവാക്കി വാർത്തയിലെ അഭിപ്രായങ്ങൾ സുതാര്യമായി നൽകണം എന്ന് അറിയിക്കുന്നു