കേളകം: വേനല്‍ കടുക്കുന്നതോടെ മലയോരം വരള്‍ച്ചയുടെ വക്കില്‍. ആയിരക്കണക്കിനാളുകള്‍ കുടിവെള്ളത്തിനും മറ്റ് ആവശ്യങ്ങള്‍ക്കുമായി ഉപയോഗിക്കുന്ന ബാവലി, ചീങ്കണ്ണി പുഴകള്‍ വറ്റി തുടങ്ങി. സമീപ പ്രദേശങ്ങളിലെ കിണറുകളിലെയും കുളങ്ങളിലെയും ജലനിരപ്പ് താഴ്ന്നു.
കൊട്ടിയൂര്‍ പഞ്ചായത്തിലെ പൊയ്യമല, ഒറ്റപ്ലാവ്, പാലുകാച്ചി, പന്നിയാംമല, കേളകം പഞ്ചായത്തിലെ അടക്കാത്തോട്, ചെട്ടിയാംപറമ്ബ്, കുണ്ടേരി എന്നിവിടങ്ങളിലും കണിച്ചാര്‍ പഞ്ചായത്തിലെ വിവിധ പ്രദേശങ്ങളിലും ജലക്ഷാമം തുടങ്ങിയിട്ടുണ്ട്.കുടിവെള്ള ക്ഷാമത്തിനു പരിഹാരം കാണുന്നതിന് കഴിഞ്ഞ വര്‍ഷങ്ങളില്‍ വിവിധ പ്രദേശങ്ങളിലെ പുഴകളില്‍ തടയണകള്‍ നിര്‍മിച്ചിരുന്നു. ഈ വര്‍ഷവും വിവിധ പഞ്ചായത്തുകളുടെ നേതൃത്വത്തില്‍ തൊഴിലുറപ്പ് തൊഴിലാളികള്‍, കുടുംബശ്രീ പ്രവര്‍ത്തകര്‍ എന്നിവരുടെ സഹകരണത്തോടെ തടയണ നിര്‍മാണം ആരംഭിച്ചിട്ടുണ്ട്. ഈ വര്‍ഷവും വിവിധ പഞ്ചായത്തുകളുടെ നേതൃത്വത്തില്‍ ടാങ്കര്‍ ലോറികളില്‍ കുടിവെള്ളം എത്തിക്കാനുള്ള സൗകര്യങ്ങള്‍ ഒരുക്കണമെന്ന് നാട്ടുകാര്‍ ആവശ്യപ്പെടുന്നു.
ഭൂഗര്‍ഭ ജലവിതാനവും വലിയ തോതില്‍ കുറയുന്നുണ്ടെന്ന് വിദഗ്ധര്‍ പറയുന്നു. വേനല്‍ കടുത്തത്കാര്‍ഷിക മേഖലയെയും ബാധിക്കുന്നു. റബര്‍ പാലുത്പാദനം കുറഞ്ഞു. ക്ഷീര കര്‍ഷകരും പ്രതിസന്ധിയായി. കൊട്ടിയൂര്‍, കേളകം, കണിച്ചാര്‍ പഞ്ചായത്തുകളിലെ കുടിവെള്ള ക്ഷാമത്തിനു പരിഹാരം കാണാനായി കണിച്ചാര്‍ കാളികയത്ത് കുടിവെള്ള പദ്ധതിയുടെ പ്രവൃത്തികള്‍ പുരോഗമിക്കുന്നുണ്ട്. ഇതു പൂര്‍ത്തിയാകുന്നതോടെ മേഖലയിലെ ജലക്ഷാമത്തിനു ശാശ്വത പരിഹാരമാകുമെന്നാണ് പ്രതീക്ഷ.
Post a Comment
താഴെ നൽകുന്ന അഭിപ്രായം കണ്ണൂരാൻ വാർത്തയുടേത് അല്ല വ്യക്തി അഭിപ്രായങ്ങൾ അവരുടെ കാഴ്ചപ്പാട് ആണ് മതസ്പർദ്ധക്ക് ഇടയാക്കുന്ന അശ്ലീലപദപ്രയോഗങ്ങൾ എന്നിവ ഒഴിവാക്കി വാർത്തയിലെ അഭിപ്രായങ്ങൾ സുതാര്യമായി നൽകണം എന്ന് അറിയിക്കുന്നു