തിരുവനന്തപുരം: സംസ്ഥാനത്തെ 13 ആശുപത്രികള്‍ക്കി കൂടി നാഷണല്‍ ക്വാളിറ്റി അഷ്വറന്‍സ് സ്റ്റാന്റേര്‍ഡ് (എന്‍ക്യൂഎഎസ്) അംഗീകാരം ലഭിച്ചതായി ആരോഗ്യ വകുപ്പ് മന്ത്രി കെ കെ ശൈലജ. കോവിഡിനിടയിലും സംസ്ഥാനത്തെ ആരോഗ്യ സ്ഥാപനങ്ങള്‍ രാജ്യത്ത് തന്നെ മികച്ചതായി മാറിയിരിക്കുന്നു. രാജ്യത്തെ മികച്ച പ്രാഥമികാരോഗ്യ കേന്ദ്രങ്ങളില്‍ ആദ്യത്തെ 12 സ്ഥാനങ്ങള്‍ കേരളം നിലനിര്‍ത്തുന്നു.
കോട്ടയം പെരുന്ന അര്‍ബന്‍ പ്രൈമറി ഹെല്‍ത്ത് സെന്റര്‍(സ്‌കോര്‍ 94.34), മലപ്പുറം മൊറയൂര്‍ കൂടുംബാരോഗ്യ കേന്ദ്രം(92.73), കോഴിക്കോട് മോപ്പയൂര്‍ കുടുംബാരോഗ്യ കേന്ദ്രം(92.16) കണ്ണൂര്‍ എരമംകറ്റൂര്‍ കുടുംബാരോഗ്യ കേന്ദ്രം(92.6), കണ്ണൂര്‍ കല്ല്യശേരി കുടുംബാരോഗ്യ കേന്ദ്രം(91.8), എന്നീ കേന്ദ്രങ്ങള്‍ക്കാണ് ഇപ്പോള്‍ ദേശീയ ഗുണനിലവാര അംഗീകാരമായ എന്‍ക്യൂഎഎസ് ബഹുമതി ലഭിച്ചത്. ഇതുകൂടാതെ തൃശ്ശൂര്‍ വേലൂര്‍ കുടുംബാരോഗ്യ കേന്ദ്രം(95), കണ്ണൂര്‍ ചെറുകുന്നുത്തറ(88), കണ്ണൂര്‍ ആറളം ഫാം ആരോഗ്യ കേന്ദ്രം(84), കണ്ണൂര്‍ ഉദയഗിരി പ്രാഥമികാരോഗ്യ കേന്ദ്രം(94), പത്തനംതിട്ട ചെന്നീര്‍ കുടുംബാരോഗ്യ കേന്ദ്രം(87.5), തിരിവനന്തപുരം കരകുളം കുടുംബാരോഗ്യ കേന്ദ്രം(90), കണ്ണൂര്‍ പുളിങ്കോം പ്രാഥമികാരോഗ്യകേന്ദ്രം(90), എറണകുളം മനീട് പ്രാഥമികാരോഗ്യ കേന്ദ്രം(95) എന്നീ കേന്ദ്രങ്ങള്‍ക്ക് അടുത്തിടെ ദേശീയ അംഗീകാരം ലഭിച്ചിരുന്നു.
ഇന്ത്യയില്‍ ആകെയുള്ള 5190 അര്‍ബന്‍ പ്രൈമറി ഹെല്‍ത്ത് സെന്ററുകളില്‍ 36 എണ്ണത്തിന് മാത്രമാണ് എന്‍ക്യുഎഎസ് അംഗീകാരം ലഭിച്ചിട്ടുള്ളത്. അതില്‍ 7 എണ്ണം കേരളത്തിലാണ്. 21 അര്‍ബന്‍ പ്രൈമറി സെന്ററുകള്‍ക്ക് നോമിനേഷന്‍ ലഭിച്ചിരുന്നു. അതില്‍ ഏഴ് എണ്ണത്തിനാണ് അംഗീകാരം ലഭിച്ചത്. ജനുവരിയില്‍ മറ്റുള്ളവയുടെ വിലയിരുത്തലുകള്‍ പൂര്‍ത്തിയാകും. സംസ്ഥാനത്ത് 85 സ്ഥാപനങ്ങള്‍ക്കാണ് എന്‍ക്യുഎഎസ് അംഗീകാരം ലഭിച്ചിട്ടുള്ളത്. മൂന്ന് ജില്ലാ ആശുപത്രികള്‍, നാല് താലൂക്ക് ആശുപത്രികള്‍, അഞ്ച് സാമൂഹികാരോഗ്യ കേന്ദ്രം, ഏഴ് അര്‍ബന്‍ പ്രൈമറി ഹെല്‍ത്ത് സെന്റര്‍, 66 കുടുംബാരോഗ്യ കേന്ദ്രങ്ങള്‍ എന്നിങ്ങനെയാണ് എന്‍ക്യുഎഎസ് അംഗീകാരം ലഭിച്ചിട്ടുള്ളത്.
കണ്ണൂര്‍ 20 സ്ഥാപനങ്ങള്‍ക്കാണ് എന്‍ക്യുഎഎസ് അംഗീകാരം നേടിയത്. ഇത്രയേറെ ദേശീയ അംഗീകാരം ലഭിക്കുന്ന ഇന്ത്യയിലെ ഏക ജില്ലയാണ് കണ്ണൂര്‍. സര്‍വീസ് പ്രൊവിഷന്‍, പേഷ്യന്റ് കണ്‍ട്രോള്‍, ഇന്‍പുട്‌സ്, സപ്പോട്ടീവ് സര്‍വീസ്, ക്ലിനിക്കല്‍ സര്‍വീസ്, ഇന്‍ഫെക്ഷന്‍ കണ്‍ട്രോള്‍, ക്വാളിറ്റി മാനേജ്‌മെന്റ്, ഔട്ട് കം എന്നിങ്ങനെയുള്ള എട്ട് വിഭാഗങ്ങളായി 6500 ഓളം ചെക്ക് പോയിന്റുകള്‍ വിലയിരുത്തിയാണ് എന്‍ക്യുഎഎസ് അംഗീകാരം നല്‍കുന്നത്. ഇവയില്‍ 70 ശതമാനത്തില്‍ കൂടുതല്‍ മാര്‍ക്ക് നേടുന്ന സ്ഥാപനങ്ങള്‍ക്ക് ഭാരത സര്‍ക്കാര്‍ എന്‍ക്യുഎഎസ് അംഗീകാരം നല്‍കും.
Post a Comment
താഴെ നൽകുന്ന അഭിപ്രായം കണ്ണൂരാൻ വാർത്തയുടേത് അല്ല വ്യക്തി അഭിപ്രായങ്ങൾ അവരുടെ കാഴ്ചപ്പാട് ആണ് മതസ്പർദ്ധക്ക് ഇടയാക്കുന്ന അശ്ലീലപദപ്രയോഗങ്ങൾ എന്നിവ ഒഴിവാക്കി വാർത്തയിലെ അഭിപ്രായങ്ങൾ സുതാര്യമായി നൽകണം എന്ന് അറിയിക്കുന്നു