രാമന്തളി: നിർധനനും രോഗിയുമായ സുനിൽകുമാറിന് ഇനി കുടുംബത്തോടൊപ്പം അടച്ചുറപ്പുള്ള വീട്ടിൽ അന്തിയുറങ്ങാം. രാമന്തളി മഹാത്മ സ്മാരക കൾച്ചറൽ സെന്റർ സുമനസ്സുകളുടെ സഹായത്താടെ സുനിൽകുമാറിന് കൈത്താങ്ങായപ്പോൾ ഒരു ചെറുപ്പക്കാരന്റെ പാതിയിൽ നിലച്ചുപോയ ജീവിതാഭിലാഷമാണ് യാഥാർഥ്യമാകുന്നത്.
വൃക്കരോഗം അലട്ടുമ്പോഴും രാമന്തളി പരത്തിക്കാട്ടെ സുനിൽകുമാർ എന്ന 52-കാരൻ സന്തോഷത്തിലാണ്. അടച്ചുറപ്പുള്ള വീട്ടിൽ ഇനി ഉറങ്ങാമല്ലോ.
രാമന്തളിയിലെ സന്നദ്ധസംഘടനയായ മഹാത്മ സ്മാരക കൾച്ചറൽ സെന്റർ വീടിന്റെ നിർമാണപ്രവൃത്തി പൂർത്തീകരിക്കാൻ മുന്നോട്ടുവന്നതാണ് സുനിൽകുമാറിന് തുണയായത്.
വൃക്ക മാറ്റിവയ്ക്കാനുള്ള ഓപ്പറേഷന് 25 ലക്ഷത്തോളം രൂപ ചെലവുണ്ട്. രാമന്തളി മഹാത്മ സ്മാരക കൾച്ചറൽ സെന്ററിന്റെ ഗാന്ധിജയന്തി ആഘോഷങ്ങളുടെ ഭാഗമായി നടക്കുന്ന ചടങ്ങിലാണ് വീടിന്റെ താക്കോൽ കൈമാറ്റം നടക്കുക.
ഒക്ടോബർ മൂന്നിന് വീട്ടുമുറ്റത്ത് നടക്കുന്ന ചടങ്ങിൽ രാജ്മോഹൻ ഉണ്ണിത്താൻ എം.പി. താക്കോൽ കൈമാറും. മഹാത്മ സ്മാരക കൾച്ചറൽ സെന്റർ പ്രസിഡന്റ് കെ.എം. തമ്പാൻ അധ്യക്ഷത വഹിക്കും. ചടങ്ങിൽ ഗാന്ധിസ്മൃതിഭാഷണവും ഭക്ഷ്യധാന്യ കിറ്റ് വിതരണവും ഡി.സി.സി. പ്രസിഡന്റ് സതീശൻ പാച്ചേനി നിർവഹിക്കും.
Post a Comment
താഴെ നൽകുന്ന അഭിപ്രായം കണ്ണൂരാൻ വാർത്തയുടേത് അല്ല വ്യക്തി അഭിപ്രായങ്ങൾ അവരുടെ കാഴ്ചപ്പാട് ആണ് മതസ്പർദ്ധക്ക് ഇടയാക്കുന്ന അശ്ലീലപദപ്രയോഗങ്ങൾ എന്നിവ ഒഴിവാക്കി വാർത്തയിലെ അഭിപ്രായങ്ങൾ സുതാര്യമായി നൽകണം എന്ന് അറിയിക്കുന്നു